ಎಲ್ಲಾ ಕ್ಷೇತ್ರ‍್ರಗಳು ಗೊಂದಲಗೊಂಡ ಇಂದಿನ ಕಾಲಮಾನದಲ್ಲಿ ಶರಣರ ವಚನಗಳಲ್ಲಿ ಪರಿಹಾರವಿದೆ. ಆಕರ್ಷಕವಾಗಿ ಸುಳ್ಳುಗಳನ್ನು ಹೇಳುತ್ತಾ ಜನರನ್ನು ದಾರಿ ತಪ್ಪಿಸುವವರು ಹೆಚ್ಚಾಗುತ್ತಿದ್ದಾರೆ. ಕನ್ನಡ ಭಾಷೆಯನ್ನು ಸಮರ್ಥವಾಗಿ ಬಳಸಿಕೊಂಡು ಕಾಯಕ ಜೀವಿಗಳಿಂದ ವಚನ ಸಾಹಿತ್ಯವನ್ನು ಸಮಾಜಕ್ಕೆ ನೀಡಿದ ಬಸವಣ್ಣನವರು ಎಂದೆಂದಿಗೂ ಮಾದರಿ. ಇಂದಿನ ಭ್ರಷ್ಟ ವ್ಯವಸ್ಥೆಗೆ ವಚನಗಳು ಔಷಧಿಯಾಗಿವೆ ಎಂದು ಮಾಜಿ ಸಚಿವ ಎಸ್.ಎಸ್.ಪಾಟೀಲ ಅಭಿಪ್ರಾಯಪಟ್ಟರು.
ಧಾರವಾಡದ ಗಣಕರಂಗ ಸಂಸ್ಥೆಯು ಇಂದು ಕರ್ನಾಟಕ ವಿದ್ಯಾವರ್ಧಕ ಸಂಘದಲ್ಲಿ ಆಯೋಜಿಸಿದ್ದ ಬಸವ ಜಯಂತಿ ಲೇಖನ ಸ್ಪರ್ಧೆಯ ಆಯ್ದ ಲೇಖನಗಳನ್ನೊಳಗೊಂಡ “ಬಸವಣ್ಣ ; ಕರುನಾಡಿನ ಸಾಂಸ್ಕೃತಿಕ ನಾಯಕ” ಕೃತಿ ಲೋಕಾರ್ಪಣೆ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿಕೊಂಡು ಮಾತನಾಡುತ್ತಿದ್ದರು. ಇಡೀ ಜಗತ್ತು ಬಸವಣ್ಣನವರ ವಚನಗಳನ್ನು ಪರಾಮರ್ಶಿಸಿಕೊಂಡು, ಉತ್ತಮ ಅಂಶಗಳನ್ನು ಅನುವಾದಿಸಿಕೊಂಡು ತಮ್ಮೊಳಗೆ ಅಳವಡಿಸಿಕೊಳ್ಳುತ್ತಿದ್ದಾರೆ. ಆದರೆ ಹಿತ್ತಲ ಗಿಡ ಮದ್ದಲ್ಲ ಎಂಬಂತೆ ನಮ್ಮವರು ಅವುಗಳ ಮಹತ್ವ ಅರಿತುಕೊಳ್ಳಲು ತಯಾರಿಲ್ಲ ಎಂದು ವಿಷಾಧಿಸಿದರು.
ಇದೇ ಸಂದರ್ಭದಲ್ಲಿ ಸಿದ್ಧರಾಮ ಹಿಪ್ಪರಗಿ ಸಂಪಾದಿತ “ಬಸವಣ್ಣ ಕರುನಾಡಿನ ಸಾಂಸ್ಕೃತಿಕ ನಾಯಕ” ಕೃತಿಯು ಲೋಕಾರ್ಪಣೆಗೊಂಡಿತು. ಕೃತಿಯ ಕುರಿತು ಹಿರಿಯ ಸಾಹಿತಿ ಡಾ.ಬಸು ಬೇವಿನಗಿಡದ ಮಾತನಾಡುತ್ತಾ ನಾಡಿನ ವಿವಿಧ ಮೂಲದ ಸುಮಾರು ಎಂಬತ್ತು ಲೇಖಕರ ವೈಚಾರಿಕ ಲೇಖನಗಳ ಈ ಕೃತಿಯು ಇಂದಿನ ಕಾಲದ ಓದಿನ ಅಗತ್ಯವಾಗಿದೆ. ಈ ಕೃತಿಯು ಸಂಪಾದಿತ ಕೃತಿಯಂತೆ ಭಾಸವಾಗದೆ ಹಲವರು ಅನುಭವ ಮಂಟಪದಲ್ಲಿ ಕುಳಿತು ಅಂದಿನ ಬಸವಣ್ಣನವರನ್ನು ಇಂದಿನ ಕಾಲದಲ್ಲಿ ಆಧುನಿಕತೆಯೊಂದಿಗೆ ಚರ್ಚಿಸುವಂತಿದೆ ಎಂದು ಪರಿಚಯಿಸಿದರು. ಕೃತಿಯ ಸಂಪಾದಕ ಸಿದ್ಧರಾಮ ಹಿಪ್ಪರಗಿ ಪ್ರಾಸ್ತಾವಿಕ ಮಾತನಾಡಿ ಸ್ವಾಗತಿಸಿದರು. ಧಾರವಾಡ ಜರ್ನಲಿಸ್ಟ ಗಿಲ್ಡ್ ಅಧ್ಯಕ್ಷ ಡಾ.ಬಸವರಾಜ ಹೊಂಗಲ ಅವರು ಮಾತನಾಡುತ್ತಾ ನಿರಂತರ ಸಂದರ್ಭಾನುಸಾರ ಸ್ಪರ್ಧೆಗಳನ್ನು ಏರ್ಪಡಿಸುವ ಗಣಕರಂಗ ಸಂಸ್ಥೆಯು ಉತ್ತಮ ಕೆಲಸ ಮಾಡುತ್ತಿದೆ. ಇಂದಿಗೂ ಗಂಭೀರ ಸಮಸ್ಯೆಗಳ ಚರ್ಚೆ ನಡೆದಾಗ ಉಭಯ ಸದನಗಳಲ್ಲಿ ಅಂತಿಮವಾಗಿ ಶರಣರ ವಚನಗಳನ್ನು ಉಲ್ಲೇಖಿಸುವ ಮೂಲಕ ಪರಿಹಾರ ಕಂಡುಕೊಳ್ಳಲಾಗುತ್ತಿದೆ ಎಂದು ಹೇಳಿದರು. ಬಸವ ಚಿಂತಕಿ ಡಾ.ಪುಷ್ಪಾವತಿ ಶಲವಡಿಮಠ, ಸಾಹಿತಿ ಶ್ರೀಧರ ಗಸ್ತಿ, ಡಾ.ವಿಜಯಕುಮಾರ ಕಮ್ಮಾರ ಮುಂತಾದವರು ಸಂದರ್ಭೋಚಿತವಾಗಿ ಅನುಭಾವದ ವಿಚಾರಗಳನ್ನು ಹಂಚಿಕೊಂಡರು. ಇದೇ ಸಂದರ್ಭದಲ್ಲಿ ಗಣಕರಂಗ ಆಯೋಜಿಸಿದ್ದ ಬಸವ ಜಯಂತಿ ಸ್ಪರ್ಧೆ, ಪ್ರಕರಣಗಳು ಕಥಾಸ್ಪರ್ಧೆ, ಬುದ್ಧ ಭಾರತ ಕಿರು ನಾಟಕ ಸ್ಪರ್ಧೆ ವಿಜೇತರಿಗೆ ಪ್ರಮಾಣಪತ್ರ ಮತ್ತು ನಗದು ಬಹುಮಾನ ವಿತರಿಸಲಾಯಿತು. ಆರಂಭದಲ್ಲಿ ಅನುರಾಗ ಸಾಂಸ್ಕೃತಿಕ ಕಲಾ ಬಳಗದ ಡಾ.ಅನಿಲ ಮೇತ್ರಿ ಮತ್ತು ಸಂಗಡಿಗರು ವಚನ ಗಾಯನ ನೆರವೇರಿಸಿದರು. ವಚನೋತ್ಸವ ಬಳಗದ ಶಿವಾನಂದ ನಾಗೂರ ನಿರೂಪಿಸಿದರು. ರವಿ ಚಲವಾದಿ ವಂದಿಸಿದರು.
ಕಾಮೆಂಟ್‌ಗಳು
ಕಾಮೆಂಟ್‌ ಪೋಸ್ಟ್‌ ಮಾಡಿ